Ish kryeministri Hashim Thaçi ia dorëzoi të premten detyrën e kryeministrit, kreut të LDK-së, Isa Mustafa.
Ish kryeministri Thaçi dhe kryeministri i ri, Mustafa parakaluan para Gardës Ceremoniale, ndërsa pas intonimit të himnit, hynë në ndërtesën e Qeverisë.
Ndryshe, është bërë e ditur se në ora 15:00 do të mbahet mbledhja e parë e Qeverisë së re të Kosovës.
Në ditën e parë të punës si kryeministër, Isa Mustafa është kërcënuar me protesta nga sindikalistët për shkak të deklaratave të tij se nuk do të ketë rritje të pagave më 2015. Bashkimi i Sindikatave të Pavarura të Kosovës (BSPK), janë shprehur të zhgënjyer me deklaratat e Mustafës.
“Ndonëse nga shërbyesit civilë të Kosovës pritej me padurim ngritja e pagave për vitin e ardhshëm prej 25 për qind që ishte premtuar nga ish Kryeministri i Kosovës Hashim Thaçi, tani Zëvendëskryeministër, BSPK ndjehet e zhgënjyer me deklaratën e Kryeministrit të porsazgjedhur të Kosovës Isa Mustafa se kjo ngritje nuk do të ndodhë”, thekson deklarata për media e BSPK-së.
BSPK-ja konsideron se mos respektimi i premtimit për ngritjen e pagave për shërbyesit civilë është një shpërfillje eklatante ndaj kësaj kategorie punëtorësh.
Nëse nuk do të respektohet premtimi i dhënë, atëherë BSPK do t’i shqyrtoj edhe variantet e lejueshme të veprimit sindikal për realizimin e të drejtave që u përkasin /Telegrafi/