Vjosa Osmani, deputetja më e votuar në Kosovë, ka reaguar pas akuzave të nënkryetarit të LDK-së, Haki Rugova, i cili tha se deputetët që u rebeluan e bën këtë për pozita. Pas kësaj deklarate të Rugovës, Vjosa Osmani ia ka numëruar një nga një se çka është shembull i keq.
Ajo në një postim në rrjetin social Facebook thotë se shembull i keq është të mos e mbash fjalën, e jo e kundërta.
Lexojeni reagimin e Vjosa Osmanit.
Rreth linçimit publik të nënkryetarit Haki Rugova në Gazetën Epoka e Re:
– Shembull i keq është mos ta mbash fjalën, e jo e kundërta;
– Shembull i keq është t’i premtosh dhe garantosh qytetarëve diçka çdo dite për 4 vite dhe pastaj të ndryshosh qëndrim brenda natës;
– Shembull i keq është të sulmosh deputetët e partisë sate e mos ta marrësh guximin të dalësh për të dhënë argumente bindëse pse ky koalicion është lidhur;
– Shembull i keq është të shkelesh mbi vlerën themelore mbi të cilën është ndërtuar LDK-ja, e që është demokracia dhe fjala e lirë, duke mos respektuar mendimin ndryshe dhe duke linçuar publikisht ata që mendojnë ndryshe;
– Shembull i keq është të thuhet prapa shpinës kundërshtimi i koalicionit me PDK-në e të mos marrësh guxim ta thuash në sy;
– Qytetarët, i nderuar nënkryetar Rugova, do ta kenë fjalën e fundit se cili ka qenë shembulli i keq e cili shembulli i mirë.
– Tani është koha që me punë të jepet një shembull i mirë, sepse vetëm kështu mund t’i bindni të gjithë se ne e kishim gabim. Jo me sulme, jo me linçim.
Ndryshe, lidhur me deklaratën e Rugovës në orët e paradites ka reaguar edhe deputetja tjetër nga LDK, Alma Lama. /Telegrafi/