Në fshatin Hoçë e Vogël të Rahovecit, u përkujtua 16 vjetori i rënies së 9 dëshmorëve dhe 34 martirëve, në tubimin ku ishin të pranishëm shumë qytetarë, familjar, zyrtarë komunalë dhe nxënësit e shkollës fillore të Hoçës së Vogël, të cilit në fund recituan vargje kushtuar dëshmorëve dhe martirëve.
Nënkryetari i komunës se Rahovecit, Xhemali Haxhimustafa, tha se rënia heroike e dëshmorëve që i përkujtojmë sot, është shembulli më i mirë se si çlirohet një popull që ka qenë i shkelur me shekuj.
“Për t’i nderuar rëniet heroike të dëshmorëve dhe martirëve të kombit, kemi ardhur këtu nga anembanë komuna jonë të bashkuar nga katër anët, sepse rëniet e këtilla janë dëshmi se lufta e Ushtrisë Çlirimtare të Kosovës ishte gjithëpërfshirëse dhe e drejtë. Rënia heroike e dëshmorëve që i përkujtojmë sot, është shembulli më i mirë se si çlirohet një popull që ka qenë i shkelur me shekuj. Liria e Kosovës është një godinë që u ndërtua mbi gjakun e dëshmorëve dhe martirëve. Dëshiroj të përkujtoj se nderimi për dëshmorët dhe martirët e kombit është përgjegjësi institucionale dhe përmbushja e këtyre detyrimeve na bënë të gjithëve më të pasur”, tha Haxhimustafa.
Ai në fund i lutet Zotit që t’i bekoj shpirtrat e atyre që u flijuan për dheun e Kosovës, t’i ruaj dhe t’i mbroj të gjithë ata që sot mallëngjehen për të dashurit e tyre.
Kryetari i Shoqatës së Veteranëve të Luftës dega në Rahovec, Vajdin Berisha, tha se Anadrinia ishte urë lidhëse drejt kufirit shqiptaro – shqiptar, duke u bërë hambar për zonat e tjera të luftës dhe pikë kyçe e logjistikës.
“Historia e luftërave çlirimtare na ka mësuar se të gjithë ata që nuk i frikësohen vdekjes, e fitojnë pavdekësinë e Kombit shqiptar në të gjitha periudhat të vështira historike ka pasur bijë e bija që nuk janë frikësuar nga vdekja. Pranvera e vitit 1998, ishte periudha që i riktheu kombit shqiptar shkëlqimin, e kjo rrugë që u nis lavdishëm në Prekazin legjendar të Adem Jasharit, përhapi shkëndijat e luftës çlirimtare anekënd Kosovës. Edhe ky përkujtim sot, dëshmon se Anadrinia ishte urë lidhëse drejt kufirit shqiptaro – shqiptar, duke u bërë hambar për zonat e tjera të luftës dhe pikë kyçe e logjistikës”, tha Berisha.
Kurse, në emër të fshatit, foli kryetari i Këshillit Organizativ, Skender Gashi, i cili duke përmendur emrat e dëshmorëve dhe të martirëve, tha se këta ia këputën prangat shqiponjës dhe e bënë të fluturoj e lirë, sepse nuk deshën të jetonin të vdekur, por të jetojnë pas vdekjes.
“Dëshmorët e rënë ishin me të vërtetë sypatrembur, urrenin padrejtësinë dhe shtypjet ndaj kombit të vet. Ngjarja e 2 prillit për fshatin tonë kujton shumëçka, por mbi të gjitha kujton sakrificën sublime që bënë dhe përjetuan edhe fëmijët në djep”, tha Gashi./PrizrenPress.com/