14.8 C
Prizren
E hënë, 26 Shtator, 2022

Në Prizren hapet edicioni i III-të Sculp’ice

skulpNdezja e motor-sharrave dhe prerja e kubave të akullit të shtunën mbrëma në Prizren në mënyrë simbolike shënoi fillimin e edicionit të tretë të Sculp’Ice. Artistët e ftuar nga vende të ndryshme nisën punën në krijimin e skulpturave të tyre, që do të jenë gati në përvjetorin e VI-të të pavarësisë së Kosovës, e të cilat në përputhje me konceptin e këtij edicioni do të shkrihen në natën e fundit të festivalit.

Në ceremoninë hapëse të Sculp’Ice III, ka qenë i pranishëm ambasadori i Norvegjisë në Prishtinë, Jan Braathu, i cili vlerësoi këtë organizim si një ngjarje të veçantë që krijon hapësirë për takimin dhe komunikimin në mes të artistëve të vendeve të ndryshme që ndërtojnë marrëdhënie edhe me popullatën vendëse përmes artit të tyre,transmeton koha.net

“Duke qenë se ky organizim ndodh në një kohë kur nuk ka shumë ngjarje artistike, jemi të lumtur që ta përkrahim atë, sikurse që i japim mbështetje të gjitha ideve kreative që mundësojnë promovimin e njerëzve të këtij shtetit të mrekullueshëm, por edhe që sjellin dinamizëm dhe energji të re në jetën kulturore”, tha Braathu.

Ndërsa drejtori ekzekutiv i festivalit, Leutrim Fishekqiu, shpjegoi se Sculp’Fest përbëhet nga dy komponentë: Sculp’Ice dhe Sculp’Edu, të cilat organizime i paraprijnë ngjarjes kryesore që është Sculp’Biennale, që planifikohet të mbahet për herë të parë në vitin 2016.

“Sculp’ice, për herë të tretë mbahet si një manifestim kolektiv, në kuadër të cilit akulli shndërrohet në art. Duke i dhënë akullit formë artistike, festivali synon të promovojë skulpturën dhe angazhohet për krijimin e hapësirës së nevojshme për shprehjen e talentit artistik të të rinjve”, theksoi Fishekqiu. Ai ka falënderuar të gjithë sponsorët e festivalit për mbështetjen e dhënë.

Në anën tjetër kritiku i artit, Mehmet Behluli çmoi punën e organizatorëve të Sculp’Ice dhe shprehi bindjen se më këtë përkushtim është nisur rruga për Sculp’Biennalen 2016 dhe se “nuk ka dyshim që do të arrihet edhe ky synim”. Ai e shpalli të hapur festivalin.

Në vigjilje të hapjes së edicionit të tretë të Sculp’Ice, të shtunën mbrëma është debatuar mbi rëndësinë e diplomacisë kulturore në promovimin e shtetit të Kosovës. Gjatë këtij diskutimi, pjesëmarrësit e debatit theksuan se diplomacia kulturore paraqet një kanal tjetër jo-formal, me anë të cilit mund të përcillet imazhi i duhur për Kosovën.

Njëri nga panelistët e diskutimit, ambasadori norvegjez në Prishtinë, Jan Braathu pohoi se diplomacia kulturore shërben që përmes artit të prezantohet shteti dhe atë në një dritë më pozitive se që janë shpesh perceptimet nga jashtë.

“Imazhi i Kosovës në perëndim më duhet ta them me keqardhje që nuk është shumë pozitiv. Dhe këtë duhet ndryshuar. Këtë ndryshim mund ta bëjnë individët, artistët, me ide kreative, që mund të pasqyrojnë një tjetër imazh të Kosovës së vërtetë”, tha Braathu.

Ndërsa panelisti tjetër, kritiku i artit, Mehmet Behluli theksoi se diplomacia kulturore duhet të përdoret për të krijuar sa më shumë miq, që më pastaj sjell përfitime për vendin. Sipas tij, institucionet nuk kanë bërë sa duhet në këtë drejtim, por është shprehur i bindur se në këtë drejtim artistët duhet të jenë forca shtytëse dhe të detyrojnë institucionet që të veprojnë.

Edicioni i tretë i Sculp’ice do të realizohet rreth konceptit të “Shkrirjes se Barrierave”. Shkrirja do të tematizojë të gjitha seksionet e festivalit, duke shërbyer si emërues i përbashkët dhe moto e këtij edicioni.

Duke i dhënë akullit formë artistike, festivali synon të promovojë skulpturën dhe angazhohet për krijimin e hapësirës së nevojshme për shprehjen e talentit artistik të të rinjve.

Më Shumë

Çmimi i derivateve për sot

Ministria e Industrisë, Ndërmarrësisë dhe Tregtisë, ka bërë me dije se çmimi maksimal i lejuar për shitjen e naftës për ditën e sotme në...

Si do të subvencionohet fatura për ata që kursejnë rrymë në Kosovë?

Me qëllim të përballimit të krizës energjetike më të cilën po përballet vendi ynë, e veçanërisht me atë të rritjes së çmimeve të produkteve...

Lajmet e Fundit