Moti i mirë po i mundëson komunës së Prizrenit të realizojë projektet për restaurimin e shtëpive të vjetra, qindravjeqare. Këtyre ditëve ka filluar restaurimi i shtëpisë së Briskagjinjëve. Projekti po përkrahet financiarisht edhe nga Ambasada e SHBA-ve dhe do të kushtojë 60 mijë dollarë.
Zyrtarët komunalë thonë se do t”i restaurojnë të gjitha objektet e vjetra të cilat janë dëmtuar me kohën, transmeton RTK. Por, shoqëria civile kritikon mënyrën e punës, për të cilën siç thonë po përdoret betoni dhe fasadimi jo adekuat të cilat edhe po i humbin pamjen objekteve.
Komuna e Prizrenit krenohet me trashëgiminë e pasur kulturore e historike. Shumë shtëpi të vjetra me vlera të veçanta e bëjnë më karakteristik Prizrenin, por edhe tërheqës për vizitorë. Me qëllim që objektet e vjetra të mos shkatërrohen tërësisht, komuna ka filluar meremetimin e disave prej tyre.
Shtëpia e Beledijes, ajo e Ymer Prizrenit, Shtëpia e Shaip Spahiut tashmë janë vënë në funksion. Por, së fundmi ka nisur edhe meremetimi i shtëpisë së Ali Briskagjijut i cili njihet me këtë zeje qindravjeqare në qytetin e Prizrenit.
Drejtori i urbanizmit në komunën e Prizrenit, Sadik Paqarizi thotë se projekti ka gjetur përkrahjen edhe nga Ambasada e SHBA-ve. Sipas tij, projekti pritet të përfundojë deri në muajin qershor, kur edhe kremtohet përvjetori i LSHP-së.
E intervenimet në shtëpitë e vjetra të qytetit, kritikohen nga shoqëria civile. Enesa Xheldini nga OJQ, “Ec ma ndryshe” thotë se aty nuk duhet të përdoret betoni e as fasadimi, siç po bëhet në disa sosh sepse shtëpive po u humbet pamja që kanë pasur dikur.
Ajo madje si një arkitekte ka bërë edhe një hulumtim te objektet që mbrohen me ligj ku ka pas intervenime.
Vëmendjen te trashëgimia e pasur kulturore e historike e qytetit e ka edhe faktori ndërkombëtarë. Përfaqësues të ambasadave të ndryshme në Kosovë, jo rrallë herë kritikojnë dhunën, por edhe dëmtimin që po u bëhet këtyre objekteve karakteristike dhe kërkojnë nga komuna e Prizrenit që të ruhet me fanatizëm bagazhi kulturor e historik që disponon ajo nga e kaluara e bujshme.