Në Komunën e Rahovecit vazhdon regjistrimi i diasporës, i cili është duke u bërë me bashkëpunimin e mirë që ka Komuna me Ministrinë e Diasporës.
Për të realizuar këtë projekt, i cili është i një rëndësie të madhe për diasporën, në kuadër të zyrave të Gjendjes Civile në objektin e ri të Komunës janë të vendosur dy sportele të veçantë ku janë vendosur të punësuarit nga ana e Ministrisë së Diasporës.
Pjesë e këtij regjistrimi është çdo person që ka vendbanim, apo vendqëndrim jashtë Republikës së Kosovës, që ka lindur ose ka prejardhje nga Kosova. Regjistrimi i diasporës ka për qëllim evidentimin e numrit të saktë të pjesëtarëve të diasporës dhe mërgatës, shtrirjen e tyre gjeografike, strukturën demografike në funksion të ruajtjes së identitetit kulturor, gjuhësor dhe arsimor, si dhe zbatimin e politikave të përgjithshme në mbështetje të pjesëtarëve të diasporës dhe mërgatës.
Zyrtarët e angazhuar për regjistrimin diasporës dhe mërgatës deklarojnë së janë bërë të gjitha përgatitjet e nevojshme për realizimin e këtij procesi dhe njëherit ftojnë bashkatdhetarët e Komunës së Rahovecit që vijnë të paraqiten në sportelin i cili gjendet tek sportelet e zyrtarëve të Regjistrimit Civil në katin përdhes të objektit të ri të komunës dhe të kontribuojnë që projekti i regjistrimit të diasporës realizohet me sukses. /PrizrenPress.com/