E organizuar nga Trashëgimia Kulturore pa Kufij (CHwB) dhe nga Rrjeti Ballkanik i Muzeve, Konferenca e Dytë Vjetore e Muzeve “Meet See Do”, do të mbahet prej sot deri më 10 prill në Muzeun Historik Kombëtar.
Mbi 60 profesionistë të muzeve nga rajoni janë mbledhur në kryeqytetin e Shqipërisë për të diskutuar mundësitë për përmirësimin e statusit të këtyre institucioneve si gjetjen e formave për financim të projektpropozimeve të ndryshme për përmirësimin e kushteve të vështira me të cilat përballen muzetë.
Konferenca me titull “Meet See Do” (Njihuni, Shihni, Veproni), ka filluar në Muzeun Historik Kombëtar, ndërsa në të po marrin pjesë përfaqësues nga Shqipëria, Kosova, Bosnjë e Hercegovina, Maqedonia, Mali i Zi dhe Serbia.
Gjatë tri ditëve intensive, pjesëmarrësit do të kenë mundësi të dëgjojnë fjalime dhe të marrin pjesë në seminare të drejtuara prej asistentëve të njohur në të gjithë Ballkanin Perëndimor, Britaninë e Madhe dhe Suedi.
Pjesë e rëndësishme e konferencës do të jetë edhe shpallja e Rrjetit Ballkanik të Muzeve të saporegjistruar, një platfomë jozyrtare e mbi 20 muzeve nga rajoni i Ballkanit Perëndimor, që ekziston që prej vitit 2006.
Konferenca do të konkludojë me krijimin e partneriteteve të reja dhe me ide për projekte, që mund të paraqiten për financim. Ka disa grante në dispozicion të muzeve deri në 4 mijë euro si dhe një çmim të veçantë për projekte ndërkufitare, deri në 7 mijë euro.
Rrjeti i Muzeve Ballkanikë dhe Konferenca “Meet See Do” mbështeten nga Qeveria Suedeze dhe Fondacioni “Stavros Niarchos”./KultPlus.com