Kandidati për kryetar të Prizrenit nga Lëvizja Vetëvendosje, Mytaher Haskuka, është duke zhvilluar një takim me zyrtarët e LDK-së në zyret e këtyre të fundit.
Në këtë takim po diskutohet për mundësitë e një bashkëpunimi mes këtyre dy partive për ta përkrahur Haskukën në balotazhin e 19 nëntorit kundër Shaqir Totajt të Partisë Demokratike të Kosovës, njofton Klan Kosova.
Kryetari i Degës së LDK-së, dega në Prizren, Haxhi Avdyli, ka thënë më herët gjatë ditës për Klan Kosovën se takimi është kërkuar nga Vetëvendosje.
Avdyli ka thënë poashtu se qëndrimi i tyre është që këtë mandat të mbesin në opozitë, por janë të hapur për të parë se çfarë ka për të ofruar Vetëvendosje dhe cilat janë mundësitë e bashkëpunimit.
Ai ka deklaruar për Klan Kosovën se ky është takimi i parë zyrtar në mes të Vetëvendosjes e LDK-së në Prizren dhe se takime të mëhershme, ashtu siç është raportuar nëpër media, nuk ka pasur.