Partia e Fatmir Limajt ka lëshuar një komunikatë përmes të cilës thuhet se koalicioni paszgjedhor po funksionon pavarësisht se kanë hequr dorë nga pozita e Kryeparlamentarit.
“Në këtë takim u rikonfirmua se koalicioni është stabil dhe së bashku do të vazhdojmë tutje angazhimin e përbashkët për t’i dhënë vendit qeverinë e koalicionit”, thuhet në njoftimin e NISMES.
Lexojeni të plotë njoftimin
NISMA për Kosovën të shtunën ka mbajtur mbledhjen e saj të rregullt javore me kryetarët dhe koordinatorët e këshillave të degëve nëpër komuna.
Në këtë mbledhje është diskutuar për situatën politike në vend, për qëndrimin e NISMA për Kosovën në raport me situatën aktuale politike dhe për projektet e ardhshme të saj.
Kryetari i NISMA për Kosovën, Fatmir Limaj ka njoftuar kryetarët e këshillave të degëve të Nismës, për zhvillimet politike në vend.
Degët i dhanë mbështetje të fuqishme propozim zgjidhjes që koalicioni ka bërë publik dje.
“Qëndrimi i koalicionit LDK-VV-AAK-NISMA tregon pjekurinë dhe përgjegjësinë politike, qëndrim ky që hap mundësinë për formimin sa më të shpejtë të institucioneve të vendit. Tashmë pritet nga pala tjetër që të reflektojë për të gjetur zgjidhjen sa më të shpejtë për formimin e institucioneve të vendit, zgjidhje kjo që reflekton shumicën parlamentare në kuvend dhe duke respektuar vendimet e Gjykatës Kushtetuese”, është thënë në mbledhjen e NISMA-s.
Në këtë takim u rikonfirmua se koalicioni është stabil dhe së bashku do të vazhdojmë tutje angazhimin e përbashkët për t’i dhënë vendit qeverinë e koalicionit.