Forumi Kulturor i Kosovës ka organizuar një vizitë studimore në Zagreb gjatë të cilës janë pritur në takim edhe nga ambasadorja e Kosovës atje, Shkëndije Geci.
Ndër të tjera ata në Zagreb kanë pasur mundësi të njihen për së afërmi me mënyrën se si funksionon skena e pavarur kulturore.
Përfaqësuesja e Forumit Kulturor, Besa Luzha, përmes faqes së saj në rrjetin social Facebook, ka shprehur përshtypjet e saj për këtë vizitë.
“Nga vizita në Zagreb, mund të ndaj tri përvoja shumë interesante, mundësia e zhvillimit të skenës kulturore të pavarur ( NGO, individë-artistë, shoqata, klube artistike etj) është një model interesant për tu trajtuar dhe aplikuar edhe në Kosovë. Përmes Ligjit për Lojërat e Fatit, 50% e të hyrave nga Lotaria Kombëtare dhe lojërat e fatit alokohen në Fondacionin Kombëtar për Shoqëri Civile -14%, Fondacionin Kombëtar për Kulturë, Kultura Nova, 5% dhe të tjerat për fusha të tjera, pra në përgjithësi ai fitim nga këto biznese i kthehet shoqërisë si e mirë publike. Nga këto fonde pastaj financohen organizatat e shoqërisë civile edhe në fushën e kulturës.
Përvoja tjetër interesante është vete rregullimi demokratik i organizatave në fushën e kulturës ku të gjitha organizatat që aplikojnë për fonde bëhen bashkë, i propozojnë projektet e njeri-tjetrit, i diskutojnë dhe vetëvendosin cili ka prioritet për tu përkrahur përmes një sistemi të paracaktuar vlerash dhe kriteresh përmes pikëve të alokuara për kriteret.
Përvoja e tretë, është përdorimi i hapësirave publike për aktivitetet kulturore të organizuara nga shoqëria civile (objekte të zbrazëta, ish-fabrika, etj) të cilat menaxhohen nga institucionet dhe organizatat e kulturës”, ka shkruar Luzha.
Bashkë me Forumin Kulturor në këtë vizitë studimore ishte edhe drejtoresha e Drejtorisë së Kulturës, Rinisë e Sportit në Komunën e Prishtinës, Saranda Bogujevci dhe drejtori i Departamentit të Kulturës në MKRS, Kamuran Goranci. /KosovaLive