Nxënësit e gjimnazit “Gjon Buzuku” në Prizren i janë nënshtruar sot testit ndërkombëtar të vlerësimit PISA.
Drejtoresha e Arsimit në Komunën e Prizrenit, Luljeta Veselaj-Gutaj, tha se në këtë proces do të marrin pjesë gjithsej 530 nxënës nga 18 shkolla të komunës.
“Sot, në Prizren ka filluar të mbahet testi vlerësues ndërkombëtar PISA. 530 nxënës nga 18 shkolla do të marrin pjesë në këtë test, i cili mat aftësitë reale të nxënësve në lexim, matematikë dhe shkencë”, tha Veselaj-Gutaj.
Sipas saj, se janë ndërmarrë të gjitha përgatitjet sipas rekomandimeve të Ministrisë së Arsimit, Shkencës, Teknologjisë dhe Inovacionit për organizimin dhe mbarëvajtjen e këtij procesi.
“Shpreh mirënjohje për drejtuesit e shkollave dhe mësimdhënësit për angazhimin maksimal dhe për përkrahjen e dhënë nxënësve me qëllim që të arrijnë rezultate sa më të mira”, u shprreh Veselaj-Gutaj.
Drejtoresha e gjimnazit “Gjon Buzuku”, Gylaj Shipkovica-Karjagdiu, tregoi se institucioni që ajo drejton ka punuar me përkushtim për të përgatitur nxënësit për këtë test të rëndësishëm.
“Si shkollë, kemi bashkëpunuar ngushtë me nxënësit për t’i përgatitur ata sa më mirë dhe për të treguar sukses në testin PISA”, u shpreh ajo./PrizrenPress.com/
