Publikimi i njoftimit për kandidatët më të suksesshëm lidhur me procedurat e rekrutimit për angazhimin e nëpunësve për shërbime të veçanta, përkatësisht bashkëpunëtorëve profesionalë për regjistrimin e tatimit në pronë dhe atyre për zhvillimin e projekteve kulturore e rinore ka ngjallur reagimin e opozitarëve në Prizren.
Përfaqësuesit e subjekteve më të mëdha opozitare në Kuvendin e Komunës kanë akuzuar kryetarin e Komunës, Mytaher Haskuka, për nepotizëm respektivisht punësimin e vajzës së axhës. Sipas tyre, në këtë rast pos familjares së kryetarit janë punësuar edhe militantët partiakë, shkruan sot Koha Ditore.
Shefi i këshilltarëve të AAK-së në KK-në e Prizrenit, Ilir Baldedaj, ka ironizuar duke thënë se Haskuka po e lufton nepotizmin me punësimin e familjarëve të tij.
“Luftën e premtuar kundër nepotizmit Mytaher Hakuka e nis me punësimin e vajzës së axhës së tij”, ka thënë Baldedaj.
Sipas tij, Mytaher Haskuka që gjatë fushatës paraelektorale është paraqitur si ‘engjëll’ tashmë ka filluar që t’i shpalosë qëllimet ‘djallëzore’ të tij.