Delegacioni i Kosovës në bisedimet me Serbinë ka pranuar të hënën në Bruksel që OSBE-ja të marrë kompetenca shtesë në zgjedhjet lokale të 3 nëntorit. Derisa me marrëveshjen fillestare palët ishin marrë vesh që OSBE të organizojë vetëm zgjedhjet e Kosovës në komunat veriore, tashmë kompetencat e OSBE-së janë zgjeruar.Ky mision evropian ka marrë përsipër edhe organizimin e zgjedhjeve të Kosovës në Serbi, përkatësisht do të kujdeset për votimin e serbëve të Kosovës që jetojnë në Serbi. Tribuna ka marrë vesh se pala kosovare është pajtuar që OSBE të hapë një qendër në Serbi ku serbët e Kosovës të mund t’i dërgojnë fletëvotimet.
Kjo do të bëhet me arsyetimin se postat e Serbisë dhe Kosovës nuk kanë bashkëpunim. Rolin e ri të OSBE-së e ka konfirmuar për Tribunën kryetarja e KQZ-së Valdete Daka, e cila është edhe anëtare e ekipit të Kosovës për zbatimin e marrëveshjes për normalizim të marrëdhënieve mes Kosovës dhe Serbisë