Partia Demokratike e Kosovës ishte e përgatitur që nëse nuk do të thyhej Blloku LVAN, vendi do shkonte në zgjedhje të reja. Drejtuesit e PDK-së nuk besonin se Blloku do të hiqte dorë nga posti i kryetarit të Kuvendit, dhe tërë përgjegjësinë për krizën politike në vend ta bartin te partia e drejtuar nga Hashim Thaçi.
“Në PDK ishin të bindur se bllokada për kryetarin e Kuvendit do ta çonte më shpejt vendin në zgjedhje dhe i tërë faji do t’i adresohej Bllokut LVAN dhe ky do të ishte një avantazh i madh për ne gjatë fushatës elektorale”, i ka thënë Gazetës Blic një zyrtarë i lartë i PDK-së, në kushte anonimiteti. Sipas këtij burimi, tani ka ndryshuar situata.
Sipas këtij zyrtari, heqja dorë e Bllokut nga posti i kryetarit të Kuvendit, e ka zënë PDK-në të papërgatitur për këtë situatë.
Zyrtarisht nga PDK nuk kanë dashur të flasin duke thënë se tashmë janë deklaruar dhe se sipas tyre nuk ka institucione pa marrëveshje me ta.
Drejtuesit e PDK-së dhe Flora Brovina para se të filloj të qarkulloj ideja që posti i kryetarit të Kuvendit t’i jepej partisë së Hashim Thaçit, deklaronin se seancë konstituive nuk do të ketë pa marrëveshje për kryetarin e Kuvendit. Mirëpo, tani kur Blloku u zotua se do të votoj kandidatin e PDK-së, partia më e madhe në vend, insiston se nuk do të ketë seancë pa marrëveshje edhe për qeverinë.
Pavarësisht kësaj krize, duket se as e para e vendit nuk do të veproj.
Presidentja e Kosovës, Atifete Jahjaga ende nuk është deklaruar nga e premtja se cilët do të jenë hapat që duhet të ndërmarrë ajo për tejkalimin e kësaj bllokade, sidomos tani pas heqjes dorë nga posti i kryetarit të Kuvendit.
I vetmi që deri më tani ka reaguar ndaj këtij veprimi të Bllokut është ambasadori i Mbretërisë së Bashkuar në Kosovë, Ian Cliff, i cili tha se ky hap është një sinjal i mirë për tejkalimin e ngërçit politik.
Ndërkohë, ambasadorja amerikane, Tracy Ann Jackobson në një ligjëratë që ka mbajtur javën e kaluar ka thënë se nëse ka marrëveshje për kryetarin e Kuvendit, atëherë nuk ka asnjë arsye që kjo çështje të zvarritet. Por, PDK kësaj radhe duket se nuk do tu bindet as amerikanëve.
Kosova tashmë ka hyrë në muajin e gjashtë që kur janë mbajtur zgjedhjet e parakohshme të 8 qershorit dhe ende nuk janë krijuar institucionet.