Përfaqësuesit e Iniciativës Qytetare dhe BIK-ut janë takuar sot me Kryesinë e PDK-së në Prizren. Ata në këtë takim kanë kërkuar mbështetjen e PDK-së për rindërtimin e Xhamisë në Kala.
“Në këtë takim, Dega e PDK-së, u informua rreth Iniciativës Qytetare, e cila është themeluar për inicimin e projektit për rindërtimin e Xhamisë në Kalanë e Prizrenit, si dhe u njoftua edhe me kërkesat e bëra nga ana e Iniciativës Qytetare dhe BIK-ut, adresuar Ministrisë së Kulturës, Rinisë dhe Sportit, lidhur me këtë projekt, dhe me shqetësimet e tyre sa i përket kësaj kërkese”, thuhet në komunikatën e PDK-së në Prizren.
Nënkryetari i Partisë Demokratike të Kosovës, Dega në Prizren, Hasan Hasani, dhe Sekretari Organizativ, Kujtim Gashi, në takimin që kanë zhvilluar me Iniciativën Qytetare dhe përfaqësuesit e Bashkësisë Islame të Prizrenit, të prirë nga Kryetari i BIK-ut, Besim Berisha, thanë se MKRS, duhet të jep përgjigje të merituar kërkesës per rindërtimin e Xhamisë në Kala.
“PDK, Dega në Prizren, duke qenë e vetëdijshme për rëndësinë dhe të drejtat e secilës palë, institucion, Iniciativa qytetare etj, për të iniciuar dhe kërkuar shërbime nga institucionet, dhe duke qenë në mbështetje të çdo kërkese legjitime qytetare, kërkon nga Ministria e Kulturës Rinisë dhe Sportit, ta trajtojë me kujdes të veçantë këtë kërkesë, dhe t’i japë përgjigjen e merituar Iniciativës Qytetare, e themeluar për këtë qëllim, dhe Bashkësisë Islame të Prizrenit, si mekanizëm i cili mbron të drejtat e komunitetit të saj”.
“Po ashtu, PDK, Dega në Prizren, mbështet fuqishëm organet kompetente brenda MKRS-së, të cilat duhet t’i përgjigjën kërkesës së BIK-ut, natyrisht, duke kërkuar që të respektohen të gjitha normat ligjore dhe të gjitha konventat ndërkombëtare, të cilat në njërën anë respektojnë të drejtat qytetare për të shprehur vullnetin e tyre për realizim të kërkesave, dhe në anën tjetër, respektojnë dhe kërkojnë ruajtjen e Trashëgimisë Kulturore, si aset të çmuar e të mbrojtur, duke marrë vendim në përputhje të plotë me legjislacionin përkatës”./PrizrenPress.com/