Peja është kualifikuar në gjysmëfinalen e Kupës së Kosovës, e cila është organizuar në palestrën “Mizahir Isma” në Rahovec.
Pejanët e kanë mundur pastër skuadrën e Ponte Prizrenit në cerekfinale, përcjellë Gazeta Olle.
Rezultati në fund shënonte 97:86 për skuadrën verdhezi.
Peja, e cila pjesën e parë e mbylli me 18 pikë epërsi, 52:34, ishte më e mirë gjatë gjithë kohës dhe nuk e rrezikoi fitoren për asnjë moment.
Kësisoj, verdhezinjtë konfirmohen mes skuadrave top-favorite për trofeun.
Atmosfera në palestër ishte e këndshme, ku prezent ishin tifozët nga Peja, Shqiponjat.
Ata janë paraqitur me transparentin e ri, pas rënies së transparentit të vjetër në Prizren.
Madje, transparenti Shqiponjave iu ra pikërisht në ndeshjen ndaj Pontes, skuadër të cilën Arpagjiktë nuk e mbështesin në mënyrë të organizuar.
Pejanët nuk kanë udhëtuar në numër të madh, por një gjë të tillë pritet ta bëjnë në ndeshjen e rrethit tjetër. /Gazeta Olle/