Grupi i Qytetarëve Aktivë “Për Prizrenin” kanë kritikuar paraqitjen e kryetarit të Komunës së Prizrenit Ramadan Muja në panairin e produkteve vendore.
“Sot, në qendër të Prizrenit gjersa po mbahej panairi i produkteve vendore, “kryetari” i Prizrenit, u shfaq papritmas për të përshëndetur këtë organizim dhe për të bërë thirrje për konsumim të produkteve vendore”, thuhet në komunikatën e Grupit të Qytetarëve Aktivë “Për Prizrenin”.
“Organizatorët e këtij panairi, bashkë me ftesën për Ramadan Mujën, kishin harruar të hapnin një shtand të ri, shtandin e korrupsionit, sepse, ndër të tjerash, prezenca e tij në këtë panair, i shton larminë produkteve ‘vendore’, duke qenë se ai prej kohësh është promotori dhe prodhuesi kryesor i korrupsionit”.
“Punësimet në administratë, shëndetësi dhe arsim, në këmbim të shumave të ndryshme të parave kanë përcjellur vazhdimisht qeverisjen e tij, për cka shumë zyrtarë komunal((më së shumti në Kosovë) po hetohen dhe akuzohen nga organet e drejtësisë”.
“Mbindërtimet dhe tejkalimi i lejeve ndërtimore në këmbim të benefiteve për vartësit e Ramadan Mujës hyn në listen e gjatë të veprimtarive të qeverisë së tij”.
“Tejkalimi i procedurave ligjore për t’u dhënë pronën publike kompanive të private tregon një pjesë tjetër të produkteve autentike të qeverisjes së Ramadan Mujës”.
“Shpërdorimi i fondeve publike për dreka e darka është poashtu karakteristike e këtij pushteti lokal. Ndërsa, shpërdorimi i fondeve të dedikuara manifestimeve në nderim të dëshmorëve tregon se deri ku arrijnë apetitet e zyrtarëve të Ramadan Mujës”.
“Shërbime” si këto dhe të tjera, veçori kryesore të këtij pushteti, tregojnë se korrupsioni është veprimtaria kryesore dhe prodhuese e pushtetit lokal në Prizren”.
“Dhe, në panairin e produkteve vendore të mbajtur sot në Prizren, prezenca e Ramadan Mujës si bartës i korrupsionit, nënkuptonte promovimin e tij si “produkt vendor”./PrizrenPress.com/