Nisma e Bekim Haxhiut për tërheqjen e 30 % nga Trusti dështoi në Kuvend, javën që shkoi.
Por, një tjetër iniciativë e njëjtë mund t`u shkojë përsëri para vetës për votim ligjvënësve.
Kjo në rast se dërgohet në legjislativë peticioni me mbi 10 mijë nënshkrime, grumbullimi i të cilave ka nisur tashmë nga vetë qytetarët.
Prijësi i tyre, Adnan Jashari – i vendosur me tendë në sheshin “Nënë Tereza” në Prishtinë – thotë se nuk po mungon interesimi.
“Sot është dita e parë në Prishtinë. Deri tash janë 250 nënshkrime që janë mbledh nga ora 12:00 vetëm në Prishtinë. Qytetarët përmes kolegëve dhe miqve po i sjellin njerëzit”, u shpreh Jashari për “Front Online”.
Arsyeja e atyre që duan t`i tërheqin kursimet e tyre pensionale tash para se ta arrijnë pleqerinë është e qartë.
“Po më thojnë mezi s`po presim me shku prapë në Kuvend kjo nismë për shkak se paratë iu duhen me përballu krizën ekonomike që e ka kaplu vendin – çmimet e larta”, theksoi Jashari për “Front Online”.
Peticioni i ngjashëm po u shpërndahet qytetarëve edhe në dy komuna tjera, Fushë Kosovë e Han të Elezit.
“Nuk do të ndalemi deri sa t`i arrijmë mbi 10 mijë nënshkrime”, tha ai për Front Online.
Nismën për të propozuar ligje, sipas nenit 79 të Kushtetutës së Kosovës, mund ta marrë Presidenti i Republikës së Kosovës nga fushëveprimtaria e saj/tij, Qeveria, deputetët e Kuvendit, ose më së paku dhjetëmijë qytetarë, sipas mënyrës së përcaktuar me ligj./Front Online/