Futbollisti i Benfica-s, Nicolas Otamendi, është bërë viktimë e një sulmi të dhunshëm, që ndodhi në shtëpinë e tij nga disa hajdutë profesionistë.
Mediat portugeze raportojnë që Otamendi-t përveç se iu vodhën gjësende me vlerë prej 300 mijë euro, ai u torturua së bashku me familjen e tij, nga katër hajdutë të cilët ishin me maska dhe doreza.
Me t’u rikthyer në shtëpi rreth orës 1:00 të mëngjesit të së hënës, pas fitores 1:4 ndaj Famalicao-s, ish-mbrojtësi i Manchester City-t hasi në hajdutët të cilët ishin në shtëpinë e tij.
Ai më pas ishte prangosur dhe lidhur me rrip në qafë nga hajdutët profesionistë, për të shmangur çdo reagim të tij.
Kriminelët, të cilët e dinin se futbollisti argjentinas po kthehej në shtëpi pas ndeshjes së kampionatit, e kanë pritur dhe e kanë detyruar të futet në dhomën e tij, ku gjendeshin gruaja dhe djali, të cilët janë tmerruar nga ajo që po i shihnin sytë.
Raportet fillestare thanë se katër burra morën pjesë në sulmin e dhunshëm në Herdade da Aroeira, por mediat portugeze citojnë burimet e policisë që thanë se deri në shtatë kriminelë mund të kenë qenë të përfshirë në këtë sulm.
Një pjesë e bandës besohet se kanë qëndruar jashtë shtëpisë së tij për të vëzhguar situatën, ndërsa bashkëpunëtorët e tyre ishin brenda duke kryer sulmin.
Në raportet e policisë portugeze, thuhet se asnjë nga sulmuesit nuk kishte folur portugalisht.
Gjithashtu në hetimet e policisë, thuhet se banda mund të ketë udhëtuar në Portugali vetëm për të kryer këtë krim dhe mund të jetë e njëjta që bëri bastisjet e shtëpive të tjerëve futbollistë, që ende kanë mbetur të pazgjidhura.
/Albanianpost.com