Presidentja e Kosovës Atifete Jahjaga, me t’u kthyer nga Amerika, është vënë në lëvizje për ta gjetur një model për dalje nga kriza politike, në të cilën është futur vendi pas zgjedhjeve parlamentare më 8 qershor. Për dy ditë rresht ajo ka takuar liderë të partive politike pjesëmarrëse në Kuvend, nga të cilët ka dëgjuar propozimet e tyre për dalje nga kriza.
Deri më tani presidentja nuk ka ofruar asnjë plan, duke ua lënë në dorë deputetëve që vet të gjejnë zgjidhjen. Sidoqoftë, Jahjaga edhe të mërkurën do të bëjë përpjekje që t’i ftojë në një tavolinë të gjithë liderët e partive për të arritur një marrëveshje për krijimin e institucioneve të reja.
Burime të gazetës Tribuna brenda Presidencës bëjnë të ditur se nëse liderët vazhdojnë më qëndrimet e tyre, atëherë presidentja me pëlqim edhe të ndërkombëtarëve do ta shpalosë planin e saj për dalje nga ngërçi.