Presidentja e Kosovës, Vjosa Osmani, për nderë të 25-vjetorit të “Epopesë së Ushtrisë Çlirimtare të Kosovës”, ka ndarë “Urdhrin e Lirisë” për Rifat Jasharin, vëllaun e Adem dhe Hamëz Jashari.
Këtë presidentja Osmani e ka bërë në një vizitë në shtëpinë e Jasharëve në fshatin Prekaz të Komunës së Skenderajt, ku së bashku me kryeministrin Albin Kurti, kryeparlamentarin Glauk Konjufca dhe anëtarë të tjerë të kabinetit qeveritar kanë bërë homazhe te varret e familjes Jashari.
“Sikurse çdo shqiptar, pavarësisht se ku jeton, jemi këtu në Prekazin historik të Epopesë së UÇK-së, por edhe çdo ditë të vitit është edhe një mundësi që të gjithë qytetarët e Kosovës të tregojnë përkujtimin e tyre edhe për të gjitha gratë dhe fëmijët e familjes Jashari të cilët nuk i kurseu regjimi gjenocidal i Serbisë”, tha ajo.
“Siç e dini në mesin e të vrarëve kishte edhe fëmijë 5-6 vjeçar – përkujtimi i tyre do të jetë i përjetshëm për gjithë Kosovën e cila sot është e lirë falë kësaj sakrifice”, ka shtuar presidentja Osmani.
Në Kosovë më 5 mars ka nisur shënimi i manifestimit treditor të Epopesë së Ushtrisë Çlirimtare të Kosovës, teksa krerët shtetërorë – Vjosa Osmani, Albin Kurti dhe Glauk Konjufca – nderuan rezistencën e familjes Jashari nga Prekazi.