Në një komunikate të dërguar nga Policia e Kosovës – Prizren, thuhet se janë arrestuar katër të dyshuar për fajde.
Pas një hetimi të gjatë lidhur me fenomenin e fajdeve dhe kanosjes në Prizren, hetuesit policor në bashkëpunim me Prokurorinë e Shtetit dhe me miratimin e Gjykatës Themelore, me qëllimin e gjetjes së provave materiale, sot në mëngjes janë kryer tri bastisje në lokacione të ndryshme.
Gjatë bastisjes, policia ka hasë në një armë zjarri të tipit Kallashnikov me katër karikatorë, një pushkë gjahu e prodhimit rus, një pistoletë e llojit “Zastava” me disa fishekë, një boks metalik dhe një veturë e llojit Nisan Morano, që janë sekuestruar.
Në aksion janë sekuestruar edhe disa letra e dokumente të ndryshme me interes për hetimin e rastit.
Katër persona janë shoqëruar për intervistim e më pas janë ndalur nën masën e arrestit policor.
Policia në fund të komunikatës tregon se provat materiale dhe shkresat e lëndës do t’i kalojnë prokurorisë për procedurat në vazhdim.