Familja katër anëtarshe Beqiri nga lagja “ Bajram Curri” në Prizren, është bërë sot me shtëpi të re. Ndërtimi i shtëpisë për këtë familja skamnore është bërë falë ndihmës së një bashkatdhetari.
Iniciativa për ndërtimin e shtëpisë për familjen Beqiri, që jetonte në fshatin Xërxe të Dragashit, ishte marrë nga drejtuesit e Radio “ Pendimi”.
“Pas vizitës që i bëmë kësaj familje, jemi ndier shumë të shqetësuar për gjendjen e rëndë pa kurrfarë kushte elementare banimi, dhe menjëherë kemi publikuar shpallje për t’i dal në ndihmë”, tha Hevzi Hasani, drejtues i Radio “Pendimi”.
“Jemi kontaktuar nga donatori vullnetmirë, i cili ka premtuar që të gjitha shpenzimet për ndërtimin e shtëpisë t’i bart, dhe tani ndjehemi të gëzuar që po i mundësohet këtyre jetimëve një jetë më e dinjitetshme”, tha Hasani.
Pjesë e dorëzimit të çelësave të shtëpisë së re të kësaj familje, ishte edhe imami, Fadil Musliu.
“Kjo është një vepër dinjitoze dhe shumë e madhe. Nuk ka fjalë dhe punë më e madhe se sa t’i ndihmohet njeriut dhe njëri-tjetrit, sepse sipas parimit islam, një person që e gëzon një vëlla të tij apo besimtarë në këtë botë, krijuesi do t’a gëzojë atë në botën tjetër”.
Ndërkaq, Fadile Beqiri, nënë e tre jetimëve, pasi që bashkëshorti i saj, kishte ndërruar jetë pas një sëmundje të rëndë kohë më parë, nuk gjente dot fjalën për të falënderuar ata që ndihmuan familjen e saj për të pasur kulm mbi kokë”.
Ndërtimi i shtëpisë ka kushtuar 30 mijë euro./TV Prizreni/