Zyrtarët policorë, Flurim Tafolli dhe Rexhep Krasniqi, të enjten, gjatë shqyrtimit fillestar të mbajtur në Gjykatën Themelore në Prizren, nuk e kanë pranuar fajësinë për keqpërdorim të pozitës apo autoritetit zyrtar.
Prokurori i rastit, Genc Nixha, ka lexuar aktakuzën me të cilën të akuzuarit ngarkohen se nuk i kanë përmbushur detyrat e tyre zyrtare, duke i mundësuar personit tjetër përfitim material, ndërsa të akuzuarit pas konsultimit me mbrojtësit e tyre, nuk e kanë pranuar fajësinë.
Mbrojtësit e të akuzuarve, avokatët Asman Hoxha dhe Arben Ramadani, kanë paralajmëruar se do të parashtrojnë kërkesë për hudhje të aktakuzës dhe kundërshtimin e provave.
Kryetarja e trupit gjykues, Ajser Skenderi, ka përfunduar shqyrtimin e parë në këtë çështje penale, ndërsa shqyrtimin e dytë e ka caktuar për 8 maj 2018, në ora 09:30.
Ky rast zhvillohet në bazë të aktakuzës së Prokurorisë Themelore në Prizren, me të cilën të pandehurit akuzohen se duke vepruar në cilësinë e zyrtarëve policorë, kanë liruar një veturë të vetaksidentuar, megjithëse e njëjta ka rezultuar e pa zhdoganuar.
Sipas aktakuzës, në automjetin e liruar nga të pandehurit kanë qenë të vendosura tabelat e regjistrimit të një automjeti tjetër, andaj sipas organit të akuzës, ata është dashur ta dërgojnë automjetin në terminal doganor, e jo ta lirojnë.