Policia e Kosovës ka dhënë detaje lidhur me shoqërimin në polici të zyrtarit e AUV-it i cili dyshohet se ka njoftuar paraprakisht disa biznese për operacionet e policisë dhe inspektorëve lidhur me zbatimin e masave antiCOVID-19.
Në raportin 24 orësh, policia ka njoftuar se zyrtari i AUV-it ishte në kryerje të detyrës i asistuar nja njësiti policor duke inspektuar bizneset dhe shqiptuar gjoba për shkeljen e masave anti COVID 19.
“Është raportuar se i dyshuari mashkull kosovar person zyrtar i AUV-së është shoqëruar në stacion policor për shkak të dyshimit se përmes telefonit i kishte dërguar sms një pronari të një marketi. I dyshuari kishte qenë në kryerje të detyrës i asistuar nga njësiti policor duke inspektuar bizneset dhe shqiptuar gjoba për shkeljen e masave anti COVID 19. Me urdhër të prokurorit, rasti procedohet në procedurë të rregullt”, thuhet në raport.
Ndryshe lidhur me këtë rast ka njoftuar edhe Inspektorati Policor i Kosovës.
“Pas disa veprimeve hetimore, hetuesit e IPK-së kanë identifikuar se një zyrtar i AUV-it (inspektor i Agjencisë së Ushqimit dhe Veterinës) dyshohet se është duke lajmëruar bizneset të cilat ishin duke punuar jashtë orarit respektivisht në kundërshtim me vendimin e Qeverisë”, thuhej në njoftimin e IPK-së.
IPK ka bërë të ditur se ndaj zyrtarit të AUV-it nga ana e hetimeve rajonale të Drejtorisë Rajonale të Prizrenit është iniciuar rast penal me dyshimin se i njëjti ka kryer veprën penale “Keqpërdorim i informatës zyrtare”. /Telegrafi/