Tomë Gashi – avokat i Fatmir Limajt – ka kërkuar mos të heshtet skandali lidhur me dyshimet se PDK-ja, në bashkëpunim me EULEX-in dhe disa zyrtarë të Brukselit, kanë ndërhyrë në Gjykatën e Apelit që Limaj dhe të akuzuarit e tjerë në rastin “Kleçka” të dënoheshin për krime lufte.
Ai i ka bërë thirrje EULEX-it të kryejë hetime të pavarura për ta ndriçuar të vërtetën e këtij skandali.
“Prej ditës së parë të gjykimit të Limajt është vërejtur se ky proces është i ndikuar politikisht”, ka thënë Gashi për “Epokën e re”.
Kryetari i Gjykatës së Apelit, Sali Mekaj, ka deklaruar për “Epokën e re” se para gjashtë muajve ka pranuar një zarf me letra, pa adresë, por ka thënë se nuk i kujtohet përmbajtja e tyre. Ai ka treguar se ato letra i ka hedhur në shportë pasi, sipas tij, kanë qenë pa adresë.
E, shefi i zyrës së BE-së në Prishtinë, Samuel Zhbogar, ka bërë me dije se në rast se këto akuza dalin të vërteta, atëherë BE-ja ka instrumente për t’i verifikuar ato dhe për të vepruar në bazë të rezultateve.