Gjatë fjalës së tij përfundimtare prokurori Genc Nixha hoqi dorë nga aktakuza kundër katër zyrtarëve komunalë të Suharekës që ngarkoheshin se i dhanë një tender operatorit ekonomik të papërgjegjshëm.
Ai arsyetoi vendimin e tij për tërheqje duke u bazuar në ekspertizën që vërtetoi se ato që janë kërkuar me tender janë plotësuar dhe deklarimin e Avokatit të Komunës së Suharekës si palë e dëmtuar se kësaj komune nuk i është shkaktuar dëm në këtë rast.
Për tërheqje, prokurori mori për bazë edhe faktin se Komisioni Rregullativ i Prokurimit Publik nuk ka gjetur shkelje në këtë tender.
“Andaj nga të cekurat më lartë, konsideroj se te të akuzuarit nuk janë formuar elementet e veprës penale të falsifikimit të dokumentit zyrtar, si dhe të veprës penale keqpërdorimi i pozitës apo autoritetit zyrtar andaj ndaj të akuzuarve Agim Bylylbashi, Ramadan Kuqi, Avni Tafolli dhe Bujar Kuqi, heq dorë nga ndjekja e mëtejme penale,” deklaroi prokurori.
Pastaj trupi gjykues mori aktgjykim refuzues ndaj aktakuzës.
“Refuzohet akuza… pasi që prokurori i shtetit është tërhequr nga akuza në përfundim të shqyrtimit gjyqësor,” tha kryetarja e trupit gjykues Ajser Skenderi.
Tre të akuzuarit e parë Agim Bylykbashi, Ramadan Kuqi dhe Avni Tafolli, akuzoheshin se në kundërshtim me Ligjin për Prokurimin Publik, i kishin rekomanduar menaxherit të prokurimit dhënien e kontratës operatorit ekonomik të papërgjegjshëm.
Sipas akuzës së Prokurorisë së Shtetit, Agim Bylykbashi, Ramadan Kuqi dhe Avni Tafolli më 28 shtator 2012 në Suharekë, në dokumentin zyrtar shënojnë informacionin e rremë në cilësinë e anëtarëve të komisionit për vlerësimin e ofertave në lidhje me tenderin ”Hartimi i rregulloreve komunale dhe përshkrimi i vendeve të punës”.
Me këtë informacion të rremë ata pastaj e hartuan raportin e vlerësimit.
Raporti i rekomandoi menaxherit të prokurimit dhënien e kontratës organizatës ekonomike të papërgjegjshme Sh.P.K. ‘’New Design’’ nga Prishtina, edhe pse kjo organizatë nuk kishte staf profesional dhe nuk e cekte në veprimtarinë biznesore ofrimin e shërbimeve juridike për të cilat ishte kontraktuar.
Për këto veprime, tre të pandehurit akuzoheshin për falsifikim të dokumentit zyrtar.
Ndërsa Bujar Kuqi, shef i Prokurimit Publik në Suharekë akuzohej për shkak të nënshkrimit të kontratës nga ana e tij.
“Duke dhënë nënshkrimin e tij më datë 04 tetor 2012, me të cilin ka dokumentuar që kontrata është dhënë në pajtueshmëri me ligjin, Kuqi, akuzohet se ka nënshkruar kontratë me organizatën ekonomike të përzgjedhur e cila nuk ka qenë e përgjegjshme”, thuhej në aktakuzë.
Kuqin aktakuza e ngarkonte se duke nënshkruar kontratën me qëllim të përfitimit të dobisë pasurore për vete ose për tjetrin, ose për organizatën e biznesit, ka shpërdoruar detyrën e tij zyrtare.
Nga 9 janari, katër zyrtarët komunalë të Suharekës janë të suspenduar nga kryetari i komunës Sali Asllanaj, për shkak të kësaj lëndeje penale./kallxo.com