Prokurorja e Prokurorisë Themelore, Fikrije Krasniqi- Zejnullahu, është caktuar si prokurore e rastit ndaj dy deputetëve opozitar Albin Kurtit të Vetëvendosjes dhe Donika Kadja Bujupi të AAK-së.
Për dy deputetët, prokurorja Zejnullahu kishte bërë kërkesë për caktimin e masës së paraburgimit prej 30 ditësh. Një kërkesë e tillë ishte aprovuar nga gjyqtari i procedurës paraprake në Gjykatën Themelore në Prishtinë.
Dy deputetët tani gjenden në paraburgim.
Prokurorja Zejnullahu e cila është duke hetuar rastet e fundit të cilat ndodhën në seancat parlamentare ku janë hedhur bombola gazi, është motra e ish deputetes së LDK-së Vjollca Krasniqit.
KALLXO.com ka shkruar për lidhjet familjare të prokurores dhe ish deputetes në legjislaturën e kaluar (2010- 2014). Portali ka kontaktuar kryeprokurorin e Prokurorisë Themelore në Prishtinë, Imer Bekën, lidhur me atë se a ka pasur prokuror tjetër të merret me këto raste përveç prokurores Zejnullahu.
Kryeprokurori lidhur me këtë ka deklaruar se nuk iu interesojnë çështjet politike pasi për ta të gjithë parlamentarët janë të njëjtë.
“Neve si prokurori nuk na interesojnë çështjet politike. Për ne të gjithë parlamentarët janë të njëjtë pa dallim. Sa i përket prokurores Fikrije Krasniqi- Zejnullahu, ajo punën e saj e ka kryer në bazë të procedurave që i parasheh ligji.”, tha ai.
Poashtu kryeprokurori Beka, ka shtuar se cilido prokuror të ishte në këtë rast do të vepronte njëjtë sikurse ka vepruar Zejnullahu, pasi sipas tij prokurorët punojnë në kolegjiume.
Deputeti Albin Kurti është arrestuar më datë 28 nëntor. Po atë ditë nga Gjykata Themelore në Prishtinë, iu është caktuar masa e paraburgimit prej 30 ditëve.
Ndërsa, Donika Kadaj Bujupi, është arrestuar më 18 nëntor dhe në ditën e njëjtë iu është caktuar masa e paraburgimit prej 30 ditësh.
Edhe Gjykata e Apelit në Prishtinë, kishte aprovuar aktvendimin e Gjykatës Themelore të Prishtinës, lidhur me masën e paraburgimit për të Donika Kadajt dhe kishte refuzuar ankesat e avokatëve mbrojtës.
Mbrojtja e Albin Kurtit, nga ana tjetër, ka paralajmëruar ankesë ndaj vendimit për paraburgim.