Në Teatrin e Akademisë së Arteve në Tiranë, është promovuar libri me poezi dhe prozë në frëngjisht me titull: “Bordeline”, i poetit të njohur frankofon me prejardhje shqiptare, Skënder Sherifi i cili jeton dhe vepron në Bruksel.
Librin autori e kishte shkruar në kohën e adoleshencës e të rinisë së tij të hershme, rreth viteve: shtatëdhjetë – shtatëdhjetë e gjashtë, kur ishte jo më shumë se 22 vjeç.
Skënder Sherifi, është një poet i njohur në Evropën frankofone, sidomos ai u bë i njohur me librin e tij të titulluar “LOVE”, botuar më 2008, libër ky i cili u mirëprit mjaft mirë nga kritika frankofone dhe si i tillë sipas gazetarëve të seksioneve të kulturës së shtypit belg, radhitet ndër 10 librat më të mirë të shkruar e të botuar në gjuhë frënge për atë vit.
Skënder Sherifi gjithashtu, është përfshirë dhe në Enciklopedinë franceze “LAROUSSE” në mesin e 28 shkrimtarëve të njohur shqiptarë.