Lidhja Demokratike e Kosovës shumë shpejt do t’i shpallë zgjedhjet e brendshme partiake. Burime brenda LDK-së i kanë thënë Gazetës Blic se brenda pak ditësh do të shpallen edhe zyrtarisht zgjedhjet e përgjithshme në këtë parti.
Zyrtarisht askush nga LDK-ja nuk ka dashur të flas se kur mund të shpallen zgjedhjet e reja në këtë parti. Gazeta Blic ka provuar që të kontakoj me disa zyrtarë të kësaj partie, mirëpo askush nuk ka dashur të flasë për këtë çështje.
As sekretari i përgjithshëm i partisë, Ismet Beqiri i cili është edhe përgjegjës për mbarëvajtjen e zgjedhjeve të brnedshme partiake nuk ka kthyer përgjigje. Ai as nuk i është përgjigjur thirrjeve telefonike e as SMS-ve të dërguar nga redaksia.
Mirëpo, burime të Gazetës Blic brenda LDK-së kanë bërë të ditur se mbajtja e shpejt e zgjedhjeve ndërlidhen me “shuarjen” e pakënaqësive që ka në këtë parti pas hyrjes në koalicion me PDK-në.
“Disa prej të pakënaqurve në parti do t’u jepen pozita në qeveri. Disa do të sistemohen nëpër agjenci apo edhe në institucione të ndryshme. Pra, edhe zgjedhjet e brendshme do të mbahen sa më shpejt, në mënyrë që të mos ketë shumë të pakënaqur dhe kësisoj të menaxhohet situata e krijuar, duke i akomoduar në pozita disa të rebeluar”, ka thënë ky burim.
Sipas këtij burimi, Isa Mustafa do të jetë kandidati më serioz për ta rimarrë sërish kreun e partisë.
“Mustafa e ka përkrahjen e njerëzve më të fortë të partisë si: Agim Veliut, Sabri Hamiti, Gazmend Muhaxherit… Edhe Lutfi Haziri me gjasë do ta mbështesë Mustafën. Në kryesinë aktuale deri më tani pos Vjosa Osmanit, askush nuk e ka sfiduar Isa Mustafën”, ka thënë ky burim.
Se a do të jetë Vjosa Osmani kundërkandidate e Isa Mustafës për postin e kryetarit të partisë, mbetet të shihet.
Ndonëse ajo në një intervistë që e ka dhënë më herët ka thënë se e mbështet Isa Mustafën, mirëpo është kundër hyrjes së tij në koalicion me PDK-në e Hashim Thaçit.
Osmani pas kundërshtimit që i bëri koalicionit PDK- LDK pati një mbështetje të fuqishme të elektoratit të partisë. Përpos që shumë simpatizant të LDK-së e mbështetën nëpër rrjetet sociale, në Facebook u hapën edhe disa faqe, ku mbështesnin Vjosa Osmanin për kryetar të LDK-së./Gazeta Blic/