Presidenti rus Vladimir Putin ka paraqitur një “plan veprimi” për të vendosur paqen në Ukrainën lindore, ndërkohë që ka zëra kundërthënës lidhur me arritjen e një marrëveshjeje armëpushimi mes forcave separatiste dhe qeverisë së Kievit.
Në komentet në kryeqytetin e Mongolisë, Ulan Bator, Putin tha se si qeveria e Ukrainës, ashtu edhe separatistët duhet të ndalin “operacionet sulmuese” në Donetsk dhe Luhansk, ku dy palët janë përfshirë në beteja të zjarrta dhe se forcat qeveritare duhet të tërhiqen në një distancë nga e cila nuk mund të godasin zonat e populluara me artileri apo armë të tjera, raporton VOA.
Udhëheqësi rus bëri thirrje gjithashtu për kontroll të plotë dhe objektiv ndërkombëtar për të garantuar respektimin e armëpushimit, ndalimin e veprimeve ushtarake në zona civile, një shkëmbim pa kushte të të burgosurve si dhe hapjen e korridoreve humanitare për lëvizjen e refugjatëve dhe ndihmave.