Jo veç subjektet që nuk janë pjesë e Ekzekutivit do ta bëjnë opozitën. Janë edhe dy opozita të tjera – tetë deputetë të LDK-së, që ishin deklaruar prej kohësh kundër koalicionit me PDK-në, si dhe deputetët e Listës Serbe, në votat e të cilëve kabineti qeveritar nuk mund të llogarisë gjithherë, shkruan sot Koha Ditore.
Këta të fundit e kanë bërë të qartë të mërkurën se Qeveria nuk mund të llogarisë në votat e tyre, madje as për buxhetin. E kundër do të jenë edhe për shumë çështje të karakterit politik që kanë të bëjnë me forcimin e Republikës së Kosovës, së cilës nuk ia njohin shtetësinë. Madje i referohen si krahinë e Serbisë.
Aleksandar Jablanoviq, lider i Listës Serbe, ka pranuar detyrën e ministrit për Komunitete dhe Kthim, të mërkurën. Deri tash ai ka qenë edhe deputet i Kuvendit të Serbisë, shtet me të cilin mban lidhje të forta.
Ky ministër serb tek është përpjekur ta justifikojë përcaktimin e kolegëve të tij për t’mos ia njohur shtetësinë e Kosovës, ka thënë se mund të japë udhëzime se disa përfaqësues tepër të rëndësishëm të shqiptarëve të Kosovës nuk e njohin Kosovën si Republikë.
Ka aluduar në përfaqësues të LVV-së, që kërkojnë bashkimin me Shqipërinë.