Akademik Rexhep Qosja ka reaguar ashpër të martën lidhur me një postim në rrjetin social Facebook nga kryeministri në detyrë, Hashim Thaçi i cili përkujton presidentin e ndjerë, Ibrahim Rugova në 70 vjetorin e lindjes, e që e shoqëron me një fotografi të konferencës së Rambouillet, ku sipas Qosjes janë hequr nga fotografia Rexhep Qosja dhe e Veton Surroi.
Kjo fotografi ka mjaftuar që akademik Rexhep Qosja ta cilësojë veprimin e Thaçit, si staliniste.
Më poshtë mund ta lexoni reagimin e Qosjes.
Sot e lexova urimin që Kryeministri në detyrë i Kosovës, Hashim Thaçi, shpalli në faqen e tij në Facebook me rastin e përvjetorit të lindjes së ish-kryetarit të Lidhjes Demokratike të Kosovës, Ibrahim Rugova.
Kryeministri në detyrë Hashim Thaçi me përkushtim të veçantë e me ndjenja sentimentale thekson bashkëpunimin e tij “pivotal” me Ibrahim Rugovën. Di shumë, ndoshta çdo gjë, për këtë bashkëpunim “pivotal” mes tyre prej Konferencës së Rambujesë e deri në vdekjen e parakohshme të Ibrahim Rugovës. Është e zakonshme në botën e qytetëruar që urimet për ditëlindje si dhe ngushëllimet për vdekje të jenë të sinqerta.
Vetëkuptohet se nuk do ta bëja këtë reagim për urimin e Kryeministrit në detyrë Hashim Thaçi me rastin e përvjetorit të lindjes së Ibrahim Rugovës sikur ky urim të mos ishte përcjellë me një falsifikat: me shkurtimin e fotografisë nga nënshkrimi i Marrëveshjes Shqiptaro-Serbe në Rambuje prej së cilës në mënyrë staliniste, jo vetëm në këtë rast, janë hequr fotografia e Rexhep Qosjes dhe e Veton Surroit.
A e këtillë duhet të jetë demokracia jonë? A e këtillë duhet të jetë historia jonë? Le të gjykojnë lexuesit. Mua s’më duhen fotografitë! Mua dhe krejt popullit shqiptar i duhen sot më tepër se kurrë përgjegjshmëri shtetërore dhe ndershmëri politike, demokratike dhe historike, që aq tmerrshëm po i mungojnë Kosovës në këtë kohë.