Gjykata Themelore në Gjakovë, dega në Rahovec, ka shqiptuar dënim me 300 euro gjobë ndaj të akuzuarit për veprën penale “blerje, pranim ose fshehje e sendeve të përfituara me kryerjen e veprës penale”, Mahmut Hoxha.
Aktgjykimi ndaj tij është shpallur nga gjykatësi, Mizahir Shabani, pasi që i akuzuari paraprakisht e ka pranuar fajësinë për akuzën me të cilën ngarkohet, raporton “Betimi për Drejtësi”.
Pas kësaj, i akuzuari Hoxha, ka thënë se ndihet fajtor për veprën të cilën e ka kryer dhe pendohet për rastin që i ka ndodhur.
Ai ka kërkuar nga gjykata që me rastin e caktimit të dënimit të ketë parasysh se është i gjendjes së dobët ekonomike, mbajtës i familjes, ashtu që t’i shqiptojë një dëmin sa më të butë.
Pranimin e fajësisë nga ana e të akuzuarit nuk e ka kundërshtuar prokurori Enis Gashi, i cili tha se është bërë në mënyrë të vullnetshme dhe pas konsultimeve të mjaftueshme me mbrojtësin e tij dhe ky pranim ka mbështetje në provat që gjendën në shkresat e lëndës.
Gjyqtari Shabani, të akuzuarin e ka obliguar t’i paguajë shpenzimet procedurale në shumën prej 30 euro në total.
Pas fillimit të seancës, gjyqtari Shabani e ka veçuar procedurën ndaj të akuzuarit tjetër për vjedhje të rëndë, Ibrahim Krasniqi, me kërkesën e mbrojtësit të akuzuarit Mahmut Hoxha, avokatit Faik Morina, pasi që ai gjendet jashtë shtetit.
Ndryshe, Prokuroria Themelore në Gjakovë, ka ngritur aktakuzë më 13 qershor 2016, ndaj Mahmut Hoxha, duke e ngarkuar atë me veprën penale “blerje, pranim ose fshehje e sendeve të përfituara me kryerjen e veprës penale”.
Sipas aktakuzës, i pandehuri më 23 shtator 2014, rreth orës 12:00 në fshatin Kijevë, Komuna e Malishevës, përkatësisht te automekanik “Fazlia” pronë e tij, ka pranuar sendin duke ditur apo është dashur të dijë se është përfituar me veprën penale të vjedhjes.
Në aktakuzë thuhet se i akuzuari Hoxha blenë një sharrë të tipit “Still” dhe një “gidore” komplet me çelësa mekanik nga i akuzuari për vjedhje të rëndë Ibrahim Krasniqi, sende këto të sekuestruara nga policia më 27 shtator 2014, të cilat i janë kthyer pronarëve Elmi Sopjani dhe Sami Morina. /BetimipërDrejtësi