Kryetari i Partisë Demokratike të Kosovës, Hashim Thaçi është rebeluar keq të premten e kaluar me atë që i ndodhi në Kuvend- për shkak të mungesës së numrave për ta kaluar projektligjin për themelimin e Gjykatës Speciale. Ishin më shumë se 10 deputetë të PDK-së që paralajmëruan se nuk do ta votojnë këtë projektligj, çka bëri që pastaj kjo çështje të shtyhet për një seancë tjetër.
Madje, mënyra se si u shty kjo seancë ishte shumë qesharake. Shefi i Grupit Parlamentar të PDK-së, Adem Grabovci kishte kërkuar që kjo çështje të shtyhet për një ditë tjetër, për faktin se tek amendamentet e këtij projektligji sapo kishin ardhur nga Brukseli, dhe kësisoj nevojitet kohë derisa të përkthehen.
Mirëpo, siç mëson Gazeta Blic kjo gjë ka ndodhur për shkak se PDK nuk i kishte numrat. Sidomos vendimi i Gjykatës Themelore në Mitrovicë, ku i dënoj me dhjetëra vjet burg të akuzuarit në të ashtuquajturin rasti “Drenica”, bëri që shumë deputetë të PDK-së të paralajmërojnë votën kundër.
Këto ndodhi, e rebeluan teje mase kreun e PDK-së, Hashim Thaçin, i cili të premten i mblodhi disa nga këta deputetë, ku u tregua shumë i ashpër me ta.
Kështu i kanë thënë Gazetës Blic burime brenda PDK-së. Sipas këtyre burimeve, Hashim Thaçi me tone të ashpra kërkoi nga një pjesë e këtyre deputetëve që ta votojnë Gjykatën Speciale.
“Në një moment Hashim Thaçi eskaloi dhe ishte shumë i ashpër në komunikim. Ua bëri të qartë që Gjykata Speciale duhet të votohet. Duhet ta votoni dhe pikë”, tha ky burim.
Sipas këtyre burimeve, madje njërit prej deputetëve që edhe po lobon që të votohet kundër i ishte drejtuar me fjalët se: “kush po mendon se je”.
“Ishte një takim mjaft i tensionuar”, tha ky burim.
Megjithatë, duket se as Hashim Thaçi e as Kadri Veseli nuk po mund të arrijnë t’i bindin deputetët e partisë së tyre që ta votojnë themelimin e Gjykatës Speciale.
Zyrtarisht askush nga PDK nuk ka dashur që të flas në lidhje me këtë takim.
I vetmi që ishte deklaruar javën e kaluar, ishte Adem Grabovci, i cili e kishte bërë shumë të thjeshtë kalimin në Kuvend të këtij projektligji. “Nesër është e xhuma dhe do ta falim”, kishte ironizuar ai me gazetarët, kur u pyet se a i ka koalicioni numrat për ta votuar Gjykatën Speciale.
Ndërkohë, sot është mbajtur mbledhja e Kryesisë së Kuvendit, dhe nuk është caktuar seanca për kur do të votohej projektligji për themelimin e Gjykatës Speciale. Në seancën e rregullt të së enjtes, Hashim Thaçi do të raportoj për demarkacionin e kufirit me Malin e Zi.
Kështu ka thënë kryetari i Kuvendit, Kadri Veseli pas përfundimit të mbledhjes së kryesisë, ku tha se nuk ka konflikt procedural që edhe ndryshimet kushtetuese edhe projektligji për dhomat e veçanta te speciale.
“Qeveria e Kosovës duhet ta procedoj ligjin në Kuvend dhe pastaj komisionet tek ne dhe më pas e dërgojmë në seancë”, ka thënë ai.
Haxhi Shala nga Nisma për Kosovën tha se pozita nuk i ka votat për specialen për atë edhe u shty seanca për specialen.
“Ne si Nismë nuk kemi presion për ta votuar specialen pasi me kohë e kemi bërë të ditur se nuk do ta votojmë”, ka thënë ai.
Ndërkohë, Nait Hasani, Fadil Demaku, Ganimete Musliu janë deputetët që në vazhdimësi kanë deklaruar se nuk do ta votojnë këtë gjykatë.
Mirëpo, pas dënimit të grupit Drenica nga ana e EULEX-it, është rritur numri i të pakënaqurve që janë kundër themelimit të kësaj gjykate.
Mediet kanë raportuar se janë hiq më pak se 11 deputetë nga kjo parti që të premten kundërshtuan gjykatën, e ata janë: Ganimete Musliu, Rafet Rama, Xhevahire Izmaku, Blerta Deliu-Kodra, Bekim Haxhiu, Nuredin Lushtaku, Sala Berisha-Shala, Fadil Beka, Fadil Demaku, Nait Hasani, Raif Qela./ Gazeta Blic