Fatmir Limaj i ka bërë dy goditje interesante që në fillim, për subjektin e tij politik. I ka rekrutuar dy personalitete të fuqishme, në Ferizaj dhe Prizren, që pritet t’i shkaktojnë dëme të pariparueshme Partisë Demokratike të Kosovës.
Fatmir Limaj tashmë e ka nisur konkretisht taktikën e tij për të fituar pikë karshi ish subjektit të tij politik, Partisë Demokratike të Kosovës. Ai nuk e ka ndërmend që të përballët frontalisht me ish subjektin e tij, por duke këtë gjë duket se do ta bëjë duke i rrëmbyer disa prej kuadrove më të zellshme të kësaj partie nëpër komuna, e që aktualisht janë të pakënaqur me mënyrën se si janë trajtuar prej PDK’së.
Si shembull konkret ai e ka rastin e Fitim Selimit, i cili në garën për komunën e Lipjanit, si individ kishte korrur një sukses të jashtëzakonshëm, duke prekur mbi 20 për qind të votave. Aktualisht Fitim Selimi është anëtar i kryesisë qendrore të “Nismës” si dhe bartës i “Nismës”.
“Nesër pritet që edhe zyrtarisht përfaqësuesit e Iniciativës Qytetare për Lipjanin, që gjenden në Kuvendin Komunal të kësaj komune, të bëhen përfaqësues të Nismës për Kosovën”, ka treguar për Express një burim i afërt me ketë subjekt politik.
Në anën tjetër, sipas të njëjtit burim, Nisma e ka rekrutuar në gjirin e saj në Ferizaj, gjeneralin Imri Ilazi, i njohur gjatë luftës si Komandant Ferri.
“Ky do të jetë figura qendrore e Nismës për Ferizaj. I njëjti do të jetë edhe në kryesinë qendrore të Nismës për Kosovën”, ka thënë një burim i Express’it, i bindur se Ilazi do të jetë një befasi e jashtëzakonshme për ketë komunë.
Gjithashtu Nisma ka depërtuar edhe në Prizren në hesapë të Partisë Demokratike të Kosovës. Atje e kanë rekrutuar doktor Sejdullah Hoxhën, i cili në një kohë ka qenë edhe deputet i PDK’së. Hoxha konsiderohet një emër i respektuar në Prizren.
“Nëse Gjykata këto ditë e shpallë fajtor kryetarin aktual të Prizrenit, Ramadan Muja, atëherë Sejdullah Hoxha ka mundësi që të jetë kandidat i Nismës për Kryetar të Prizrenit”, mëson Express.
Ndërkohë, mësohet se Limaj është duke u angazhuar t’i maksimalizoj mundësitë e tij duke përvetësuar kuadro të pakënaqura me organizimet në nivele komunale.
“Për ketë Limaj është duke i shfrytëzuar edhe informatat e çmueshme që i ka, sa kohë ka qenë njeriu i dytë i PDK’së. Ai i di mjaft mirë specifikat e PDK’së nëpër komuna, siç i di edhe raportet në mes të zyrtarëve komunal dhe peshën që ata e kanë tek elektorati”, thotë ky burim.