Presidenti i Republikës së Kosovës, Hashim Thaçi, ka nderuar senatorin amerikan John McCain me çmimin “Urdhri i Lirisë”.
Me këtë rast presidenti Thaçi, ka thënë se senatori McCain ishte bërë zë i qytetarëve të Kosovës atëherë kur nuk kishte zë për ta.
“Në botë ka pak njerëz si ju që mëshirojnë vlerat e lirisë. E tërë jeta e juaj është një moment i gjallë në përpjekjet e juaja për liri deri në vetëmohim. Në ditët tona më të vështira si komb, ne gjetëm frymëzim në shëmbëlltyrën tuaj. Ju u bëtë zëri ynë, kur ne nuk kishim zë. Ju me punën dhe angazhimin për çlirimin e Kosovës, dëshmuat se liria nuk është privilegj i të fortit, por e drejtë fundamentale e të gjitha kombeve, e të gjitha vendeve”, ka deklaruar Thaçi, duke i ndarë medaljen presidenciale senatorit McCain.
Ndërsa senatori amerikan John McCain, ka deklaruar se ndihej i nderuar për këtë çmim që pranoi nga presidenti dhe populli i Kosovës.
“Ndihem krenar që ndodhem këtu. Të gjithë e dimë se ka nevojë për më shumë punë dhe përparime, por ju keni arritur mjaftë shumë. Jam këtu të tregoj mbështetjen dhe përkushtimin e Shteteve të Bashkuara që Kosova të mbetet një vend i lirë, i fuqishëm dhe i bukur siç është edhe sot”, ka thënë ai.
Senatori McCain në këtë takim me presidentin Thaçi ka qenë i shoqëruar nga ambasadori amerikan Greg Delawie. McCaini po qëndron në Kosovë në kuadër të vizitës se tij në Ballkan. Një ditë më parë zyrtari amerikan i është adresuar Kuvendit të Kosovës.