Presidenti i Serbisë, Tomislav Nikolic, thotë se vendi i tij synon të vazhdojë negociatat e anëtarësimit në Bashkimin Europian, por nuk do t’i vendosë sanksione Rusisë.
“Kur kemi vendosur të bëjmë negociata me BE-në, nuk kemi folur për vendosjen e sanksioneve ndaj Rusisë”, ka thënë Presidenti serb, Tomislav Nikolic, në një intervistë për kanalin televiziv “Rusia 1”, transmeton RFE.
Ai ka thënë se BE-ja edhe ashtu nuk ka politikë të përbashkët në asnjë çështje, andaj qëndrimi i Serbisë ndaj Rusisë nuk duhet të jetë arsye që shteti serb të mos pranohet në bllokun europian.
“Europa nuk ka një politikë të përbashkët të jashtme në asnjë çështje. Për shembull, njohja e Kosovës. Nëse ka politikë të përbashkët, përse pesë anëtare të BE-së nuk e njohin pavarësinë e Kosovës? Ato janë: Sllovakia, Rumania, Spanja, Greqia dhe Qiproja. Kjo është shumë më serioze sesa vendosja e sanksioneve ndaj një shteti”, ka thënë Nikolic.
Perëndimi i ka bërë presion Serbisë që t’iu bashkohet sanksioneve kundër Rusisë, për shkak të veprimeve të saj në Ukrainë.