“Kur ka qenë Destan Kabashi në udhëheqësi të Komunës, Prizreni ka qenë ndryshe. Shumë më i bukur e më i organizuar”. Me një shqipe që tingëllon turqisht, ky është komenti i një të moshuari prizrenas, që flet në shoqërim e sipër për të zbuluar shtëpinë e Destan Kabashit, aty diku në mes të rrugëve gjarpërore e të ngushta të asaj që së voni ka marrë epitetin e mbrohet me ligj si Zonë Historike.
Jo shumë larg Xhamisë Mezxhid, Kishës së Shën Premtes, Muzeut Arkeologjik e Kullës së Sahatit, e në mes të disa shtëpive monumentale, ajo e Destan Kabashit shkëlqen.
Më shumë se për ngjyrën e bardhë, të cilën e ka në fasadë, kështu ndodh për shkak të dekorimeve e detajeve që e shquajnë. Me një lëvizje të dorës së majtë, në të cilën e mban edhe një gazetë, në drejtim të shtëpisë është sinjali se ky është monumenti që po kërkohej. Burri që vazhdon rrugën e tij për në shtëpi merr me vete edhe nostalgjinë për një Prizren që s’është më. E objekti në të cilin aktualisht jeton vetëm një trashëgimtar i familjes është i mbyllur, shkruan Koha Ditore.
Shembull i organizimit hapësinor
Ata që kanë bërë përshkrimin nëpër monumente të Prizrenit nuk kanë pasur se si ta kalojnë shtëpinë e Destan Kabashit. Duhet cekur se ky prizrenas, veprimtar i njohur për historinë, i cili gjatë viteve 1908-1912 ka qenë edhe deputet në Parlamentin Osman, ndërtoi dy shtëpi. Që të dyja në fillim të shekullit XX. Tjetra ndodhet buzë rrugës që përshkon rreth Lumbardhit, fare pranë Urës së Rinisë. Edhe ajo është monument, brenda Zonës Historike të Prizrenit, siç është monument i veçantë edhe një çezme që ndodhet në oborrin e shtëpisë së parë. Kroi, që ka një vaskë dhe pllakë mermeri të bardhë të zbukuruar me motive florale, është sjellë nga Selaniku…