Të gjithë shqiptarët, që kanë luftuar dhe luftojnë në Siri, janë pjesë e njësitit ushtarak, të drejtuar nga Lavdërim Muhaxheri nga Kaçaniku, i njohur në Siri, prijësi i shqiptarëve në xhihad.
Sipas dosjes voluminoze që e disponon “ABC News”, 85 vullnetarët shqiptarë që kanë luftuar apo vazhdojnë të jenë në front, janë të rreshtuar krah grupeve të njohur si “Al-Nusra”, “Dowle” dhe nëngrupeve të tjera të krijuara nga celulat e Al-Kaeda-s, që synojnë ngritjen e një Shteti Islamik të Irakut dhe Sirisë.
Këto grupe, të quajtura si më agresivët dhe më të suksesshmet në luftime, janë renditur nga Organizata e Kombeve të Bashkuara dhe SHBA-ja, në listën e grupeve terroriste.
Imami i veteshpallur i xhamisë së Unazës së Re, Genc Balla dhe ai i fashtit Mezes, Bujar Hysa, bashkë me besimtarët myslimane tashmë të arrestuar, përveç nxitjes së urrejtjes dhe thirrjeve e propagandimit për luftë, dërgonin vullnetarë shqiptarë mes ketyre grupeve terroriste.
Kjo është edhe arsyeja se pse, Prokuroria e Krimeve të Rënda, ka ngritur akuzat zyrtare ndaj tyre. Sipas dosjes, të gjithë shqiptarët, që kanë luftuar dhe luftojnë në Siri, janë pjesë e njësitit ushtarak ,të drejtuar nga Lavdërim Muhaxheri nga Kaçaniku, i njohur në Siri, si prijësi i shqiptarëve në xhihad.
Një video, e postuar muaj më parë, është administruar në dosje dhe është ne cilësinë e provës materiale në ngarkim të të dyshuarve, të cilët dërgonin vullnetare shqiptare në luftën e Sirisë.
Për të provuar se shqiptarët nuk bëjnë pjesë në radhët e opozitës siriane, në dosje, janë edhe provat, për vrasjen e Hasan Korvafajt. Vlonjati nga Kuçi, i larguar familjarisht drejt Sirisë, sipas hetimeve, rezulton i vrarë, në fillim të këtij viti, nga ushtria e lirë e opozitës.
Bashkë me Korvafajn, nga përgjimet është mësuar, se janë vrarë edhe 4 shtetas shqiptarë nga Kosova si dhe nga forcat e opozitës në Siri, janë marrë peng familjarët e tyre.
Dy javë pas pengmarrjes, me ndërmjetësimin e një shqiptari nga Maqedonia, i njohur si Ebu Katede, familja Korvafaj dhe disa familje tjera shqiptarësh janë liruar nga ushtria e opozitës siriane, që tashmë i ka shpallur luftë jo vetëm regjimit të Bashar-Al-Assadit por edhe grupeve terroriste si “Al-Nusra”, pjesë e të cilave janë edhe shqiptarët.