Përfaqësues të subjekteve politike, analistë të pavarur politikë dhe pjesëtarë të shoqërisë civile, e kanë parë me shumë shqetësim raportin më të ri të hartuar nga UNDP-ja dhe USAID-i, i cili sjell të dhëna rrëqethëse për rënien në rritje të besimit të qytetarëve ndaj lidershipit që udhëheq tri kupolat kryesore të shtetit, por edhe humbjen e shpresës në institucionet e sundimit të ligjit.
Sipas përfaqësuesve politikë dhe analistëve të pavarur, vazhdimi i humbjes së besimit të qytetarëve në krerët e shtetit dhe institucionet kryesore vjen si pasojë e ngecjes së madhe në zhvillimin ekonomik të vendit për vite të tëra, mungesës së ndëshkimit nga drejtësia të atyre individëve, që janë bërë pjesë e kriminalizimit të jetës politike, dhe vazhdimi i të qenit në krye të institucioneve me peshë shtetërore të njerëzve të korruptuar./Kosova Sot/