Vendosja e shtatores së Skënderbeut në Prizren është shtyrë për shkak COVID-19, shkruan ‘PrizrenPress’.
Kryetari i Shoqatës së Intelektualëve gjithëshqiptar, Ndue Oroshi, tha se qytetarët do të informohen me kohë për datën tjetër të vendosjes së shtatores.
“Shoqata “Trojet e Arbrit” dhe Drejtoria e Administratës e Komunës së Prizrenit, njoftojnë të gjithë qytetarët prizrenas dhe anë e kënd trojeve shqiptare që vendosja e Monumentit të Gjergj Kastriotit-Skënderbeut që ka qenë e planifikuar të vendoset më, 6 maj 2020 në Prizren do të shtyhet”, tha ai.
“Shkaku i shtyrjes është koronavirusi, cili e ka bllokuar jetën shoqërore jo vetëm në Prizren, por në mbarë globin”.
“Për datën e vendosjes së Monumentit do t´iu njoftojmë me kohë. Kjo do të bëhet karshi rrethanave dhe kohës së kalimit të epidemisë si dhe mundësisë së organizimit të tubimeve publike”.
“Meqenëse ky është një eveniment i veçantë kemi dëshirë që ta bëjmë një organizim të madh ku do të marrin pjesë përveç shumë qytetarëve prizrenas edhe shumë shqiptarë anë e kënd trojeve etnike shqiptare, si dhe mërgimtarët shqiptarë që jetojnë në diasporë dhe që janë financuesit kryesorë të këtij projekti kombëtar”.
“Për datën e re të vendosjes së monumentit do t´iu njoftojmë me kohë në mënyrë që ta keni mundësinë e pjesëmarrjes”.
Me rastin e 28 Nëntorit, Ditës së Flamurit Kombëtar, sot në Prizren ishte vendosur gurthemeli i shtatores së kryetrimit shqiptar Gjergj Kastrioti-Skënderbeu, projekt ky që ka kushtuar 70 mijë euro dhe që do të jetë i gatshëm në muajin mars të vitit të ardhshëm./PrizrenPress.com/