Ka mbi një vit që në rrugën “Mevlana” të lagjes “Kurilla” dy shtylla elektrike qëndrojnë në rrugë. Banorët e lagjes thonë se janë ankuar në KEDS, por nuk i kanë rregulluar ato. Ata thonë se para një viti KEDS-i ka sjellë dy shtylla betoni, të cilat banorët i kanë vendosur me kontributin e tyre.
Banorët ndihen të frikësuar pasi që jetojnë nën rrezikun e telave të rrymës, raporton Kallxo.com.
“Është rrezik me u këput edhe me na ra në shtëpi, edhe është rreziku ma i madh që mundet me zënë ndonjë fëmijë apo ndonjë kerr që është rrezik edhe më i madh”, thotë Kabiri.
“Që një vjet e gjysmë kërkesën e kemi bërë, e kemi lajmëru para tre muajsh, e kemi lajmëru para dy muajsh, e kam lajmëru Prishtinën, m’kanë thanë se Prizreni s’ka kompetenca, na kanë thanë Prishtina hajt se po vijmë, erdhëm. Po vijnë deri aty e po kthehen. S’e di se çka po bëjnë. A kur vjen puna me t’i lypë paret nuk pyesin hiq, as nuk cokasin, as nuk t’ i mëshojnë ziles, hyjnë drejtë edhe nuk t’i pyesin letrat”, thotë Hysniu.
Kurse zëdhënësi i KEDS-it, Guri Shkodra, tha se nuk kanë qenë të informuar për këtë rast. Madje tha se nuk ka pranuar ndonjë kërkesë ose ankesë në lidhje me këtë çështje.
“Ekipet e KEDS-it kanë vizituar menjëherë vendin e ngjarjes dhe intervenimi nuk ishte i mundshëm pasi që rruga ishte e bllokuar për shkak të punimeve. Sidoqoftë, një pjesë e punëve është përfunduar, ndërkaq nesër pritet të rregullohet problemi i raportuar”, tha Shkodra për Kallxo.com.