Sot në orët e para të mëngjesit, në shkollën fillore dhe të mesme të ulët “Ibrahim Mazreku” në Malishevë, ka ndodhur një rast i rëndë, ku ka humbur jetën një punëtor teknik, si pasojë e eksplodimit të nxehjes me gaz në këtë shkollë.
Zymer B. Hoti (1971) nga Malisheva, punëtor teknik në këtë shkollë, ka humbur jetën, përderisa kishte hyrë në objektin ku gjendet ngrohja e shkollës, e cila në atë moment kishte eksploduar.
Siç thuhet në kumtesë menjëherë në vendngjarje kanë dalë Policia e Kosovës dhe ekipet e shpëtimit, si dhe Kryetari i Komunës së Malishevës, Ragip Begaj, nënkryetari Rexhep Mazreku, drejtori i arsimit Blerim Thaçi, drejtori për mbrojtje dhe shpëtim Ahmet Morina, dhe drejtor e zyrtar tjerë komunal.
Me këtë rast, kryetari i Komunës së Malishevës, “i shpreh ngushëllimet më të thella familjes Hoti dhe farefisit të gjerë nga Malisheva” dhe këtë rast e quajti “një ngjarje e rëndë dhe tronditëse për të gjithë Malishevën”.
Organet e rendit, janë duke u marrë me rastin, ndërsa mësimi është ndërprerë përkohësisht në këtë shkollë./PrizrenPress.com/