Në mbledhjen e sotme të Këshillit Komunal për Siguri në Bashkësi e cila është drejtuar nga kryetari i këtij Këshilli, Ramadan Muja, më së shumti është diskutuar për gjendjen e rrugëve pas të reshurave të fundit, si dhe në përgjithësi për nivelin e sigurisë në komunën e Prizrenit.
Zyrtari komunal për informim, Ymer Berisha, tha se përkundër reshjeve të vazhdueshme, Komuna e ka menaxhuar si duhet situatën, “dhe mund të themi se të gjitha rrugët janë të kalueshme dhe së dëmet nga vërshimet nuk kanë krijuar telashe të theksuara”.
I pyetur se a do të ndihmojë komuna familjen Gashi, pas përmbytjeve nga vërshimet të dy shtëpive të kësaj familje që kishim raportuar ditën e premte, zyrtari Berisha, tha se lidhur me këtë çështje është duke u marr një komision i caktuar nga komuna, por shtoi, se në disa raste edhe qytetarët duhet të jenë të përgjegjshëm se a i plotësojnë kriteret urbanistike për ndërtim të shtëpive. Në mbledhjen e sotme, janë diskutuar edhe tema të tjera që kanë të bëjnë me gjendjen e sigurisë në Prizren, dhe përgjegjësitë që duhet ti kenë organet kompetente/TVPZ/