Ka më shumë se një muaj që në disa reparte të Qendrës Spitalore Rajonale “Prim. Dr. Daut Mustafa” të Prizrenit nuk ka shërbime të kujdestarisë gjatë natës. Drejtuesit e spitalit thanë se kujdestaritë janë hequr nga niveli qendror me qëllim të kursimit të buxhetit, pas një vlerësimi paraprak të bërë për numrin e vizitave të pacientëve në sektorët, që tashmë do të ofrojnë mjekë vetëm në raste emergjente.
Kësisoj shërbimet e kujdestarisë aktualisht kanë pushuar në repartet e ORL-së dhe të Pulmonologjisë (Mushkërive).
Afrim Avdaj, drejtor i Qendrës rajonale shëndetësore në Prizren, ka thënë për “Zërin” se vendimi për heqjen e kujdestarive është aplikuar nga niveli qendror, përkatësisht Shërbimi Spitalor pranë QKUK-së dhe ka të bëjë me të gjitha qendrat rajonale spitalore të vendit, të cilat duhet ta zbatojnë një vendim të tillë.