Me kërkesë të shefave të dy grupeve parlamentare të PDK-së dhe LDK-së, seanca plenare për krijimin e Qeverisë është shtyrë për sot në orën 12:00.
Për shtyrjen e seancës mbrëmë votuan 69 deputetë, derisa 30 ishin kundër. Në seancën e sotme pritet të votohet për krijimin e Qeverisë nën drejtimin e Isa Mustafës.
Lëvizja Vetëvendosje, Nisma dhe Aleanca për Ardhmërinë e Kosovës, kërkuan që mos të shtyhet kjo seancë.Fatmir Limaj është shprehur se koalicioni PDK-LDK kanë probleme me shpërndarjen e posteve e edhe probleme me Listën Srpska.
“Ata e kanë problem shpërndarjen e detyrave dhe problem tjetër është edhe Lista Srspka, si duket ata nuk munden me kriju Qeveria për pa ndërtu marrëveshje me Vuqiqin”, tha ai.
Ndërsa, Xhavit Haliti nga PDK-ja, është shprehur se shtyrja e seancës nuk është politike.
“Arsyeja nuk është ndonjë arsye politike do të thosha, janë çështje teknike të grupeve parlamentare të cilat kanë nevojë për një konsultë të mëtutjeshme…..(pyetja: kur u kuptua se ka nevojë për një konsultë, tek tani a?)……po tek tani”, tha Haliti.
E Ismet Beqiri nga LDK-ja u mundua të arsyetoj kolegët, sipas tij, për lodhje, por sikur i rrëshqiti fjala komuniteti serb. Madje u nervozua pak, tha se nuk i ruan ata ku janë.
“Janë lodh deputetët nuk ka pas edhe një pjesë e deputetëve të komunitetit nuk kanë mujt me arrit, komunitetit serb …….nuk e di unë ku ishin, nuk i kam rujt unë…..puna e numrave nuk diskutohet më, nuk është problem ajo punë”, tha ai, transmeton RTK