Kuvendi i komunës së Suharekës gjatë ditës së sotme ka nxjerrë një deklaratë ku është shprehur kundër kthimit të serbëve në fshatin Mushtisht pa u plotësuar disa kushte.
Asambleisti i Partisë Demokratike të Kosovës në Kuvendin Komunal të Suharekës, Alush Shala në një lidhje direkte në emisionin Ora e Fundit në Klan Kosova ka treguar se deklarata ka qëllim sensibilizues.
“Kjo deklaratë përmban kërkesat e banorëve të cilët i kanë familjarët e zhdukur dhe kanë dalë nga lufta shkatërrimtare me pasoja materiale si dhe pasoja në aspekte të tjera”.
“Qëllimi është sensibilizues si dhe të lëvizin institucionet e drejtësisë për zbardhjen e krimeve, n nëpermes deklaratës kërkojmë të kthehen të zhdukurit dhe të kemi kërkim falje nga ana e Serbisë dhe më pas mund të bisedojmë për kushtet e kthimit”.
Shala ka thënë se banorët e këtij fshati gjithmonë kanë kundërshtuar kthimin e serbëve.
“Kjo është hera e parë që dalim me një deklaratë për sensibilizim të opinionit derisa trazira ka pasur sa herë që serbët kanë tentuar të kthehen në fshat”.
Ai ka thënë se deklarata është si pasojë e mos reagimit të duhur të institucioneve.
“Deri te kjo deklaratë ka ardhur se institucionet qendrore dhe ato të drejtësisë nuk kanë bërë atë që duhet për banorët e fshatit Mushtisht”.
Sipas Shalës, kjo deklaratë ka qenë e harmonizuar me të gjitha grupet politike të Kuvendit Komunal derisa ka shtuar se e njejta pritet t’i adresohet Ministrisë së Kthimit.