Gjithë verën e kishte kaluar me dele në bjeshkë. Por, vetëm 10 ditë më pas Jahir Kurtishajt nga fshati Grejkoc i Suharekës i kanë ngordhur 7 dhe i janë sëmurë mbi 30 dele.
Me “gjuhën e kaltër”, siç njihet ndryshe sëmundja që po mbyt delet, Kurtishaj nuk ishte përballur asnjëherë. Por, edhe pse po ndjek udhëzimet e veterinerëve, ai nuk beson se delet e sëmura do t””i shërohen.
“Pas 10 dite që kam zbrit nga bjeshka është paraqit sëmundja. Nuk e kam ditë, por pas kontaktimit të fermerëve tjetër më kanë treguar se sëmundja është përhapur”, ka theksuar fermeri Jahir Kurtishaj.
“Katastrofë, sen nuk po hanë, tri katër ditë edhe po shkon delja”.
Edhe Sylejman Hasani nga një fshat afër Grejkocit, është duke u përballur me delet e prekura nga e njëjta sëmundje. Atij i kanë ngordhur 35 krerë delesh, ndërsa 10 të tjera i ka të sëmura. Hasani ka rreth 200 krerë delesh dhe druan se mund t””i sëmuren edhe ato.
“Deri tash 35 dele më kanë ngordhur, po i varrosi se po më thonë që as qentë mos t’i hanë, nëse më ngordhin kam mi qu para ministrisë në Prishtinë. Drejtori i pa, e më tha që nuk është rrezik për njerëzit”, ka thënë Sylejman Hasani, fermer nga fshati Baqevc.
Sëmundja nga “gjuha e kaltër”, ka shqetësuar zyrtarët e Agjencisë së Ushqimit dhe Veterinarisë. Ata thonë se kanë marrë veprimet e nevojshme për ta tejkaluar këtë sëmundje.
“Në të gjitha rastet fermerët vizitohen dhe këshillohen për veprimet të cilat duhet t””i ndërmarrin ndaj kafshëve që dyshohen si të prekura”, ka thënë Valdet Gjinovci, kryeshef i AUV-it.
E në prag të festës së Kurban Bajramit, Gjinovci ka apeluar të shitësit e kurbaneve që në asnjë mënyrë të mos i shesin ato pa kontrollin e veterinerëve.
“Për t’u realizuar shitja duhet të bëhet kontrolli para therjes. Apeli për konsumatorët është që delet që i ka prekur sëmundja të mos blihen dhe të konsultohet me veterinarin”, ka shtuar Gjinovci.
“Si çdo fermer edhe unë kam prit që për Bajram do të tregtoj diçka, por shëndeti i njeriut nuk krahasohet me jetën e njeriut. Natyrisht që kemi humbje por nuk duhet t’i shesim. Unë nuk jam i interesuar t””i shesë në këtë gjendje”, ka thënë fermeri Jahir Kurtishaj.
Në Agjencinë e Veterinarisë thonë se deri tani kjo sëmundje nuk mund të parandalohet, por vetëm të mjekohet. Që nga shfaqja “gjuhës së kaltër” në Kosovë deri tani kanë ngordhur mbi 170 krerë dele../rtk/