Shaip Krasniqi 44 vjeçar nga fshati Maqitevë e Suharekës u vra parmbrëmë afër një lokali të këtij fshati. Për rastin ka folur vëllai i dorasit, që tregon se ata kanë qenë shokë mes vete, por e gjithë zënka ka filluar për 20 euro, dhe ka përfunduar me vrasje, pasi sipas tij të dy kishin qenë të dehur.
44 vjeçari u qëllua nga shoku i tij, Sylejman Ahmeti, pas një zënke që, sipas dëshmitarëve, nisi për 20 euro.
Ngjarjen e tregon vëllai i dorasit, të cilën ia kishin transmetuar njerëzit prezent kur ndodhi incidenti.
“Ai i pitë, edhe ky pak i pitë. Ka shku i ka thonë kam punë pak me ty. Ka shku me ja dhonë dorën, ky s’ja ka dhonë dorën, e ka sha. N’kofsh burrë hajde dalim jashtë. Dalin jashtë, ky i merr haz me bisht sakice, ky sa për sherr e ka pasur armën me vete. Të dy kanë qenë të dehun”, ka thënë vëllai i dorasit në një bisedë për Klan Kosova.
Tutje, ai ka shtuar se vëllai i tij dhe viktima kanë qenë shokë shumë të mirë mes vete, dhe thotë se janë të një gjakut me ta.
“Baba jem rahmetlija me babën e viktimës shokë kanë qenë. Ne kemi pasur raporte shumë të mira me ta si familje. Por që vjen kjo punë, ma para dekën e kisha kujtu. E ka marrë vetën në qafë e edhe atë jaranin”, ka thënë ai.
Policia ka arrestuar dorasin, dhe në veturën e tij ka gjetur edhe armën me të cilën është kryer krimi, një armë gjysëmautomatike, e njohur si dhjetëshe.